ASSEB/SEBA Class 10 Bodo Medium MIL Chapter-9 Question Answer "समाज फोसाबगिरि गुरुदेब कालिचरण ब्रह्म"
फरा-9
समाज फोसाबगिरि गुरुदेब कालिचरण ब्रह्म
सोंथि
1. गाहायाव होनाय सोंथिफोरखौ मोनसे सोदोब एबा फंसे बाथ्राजों फिन हो-
क) कालिचरण ब्रह्मआ माब्ला जोनोम मोनदोंमोन?
फिननाय:- बांला 1267 मायथाइनि (1860 इ०) बैसाग दाननि 5 अक्ट’खालि कालिचरण ब्रह्मआ जोनोम मोनदोंमोन।
(ख) कालिचरण ब्रह्मनि बिफाया मा धोरोम सिबियोमोन?
फिननाय:- बाथौ धोरोम।
(ग) कालिचरण ब्रह्मखौ लेखा फोरोंनो थाखाय न आव लाखिनाय फोरोंगिरिनि मुङा मा?
फिननाय:- बीर नारायण मेस (बिरनाराम)।
(घ) बर’फोरनि गेजेराव सोर Clarion Call होदोंमोन?
फिननाय:- गुरुदेब कालिचरण ब्रह्मआ।
(ङ) साइमन कमिसननो गोसोखां बिलाइखौ माब्ला होदोंमोन?
फिननाय:- 1929 मायथाइनि 4 जानुवारि खालि।
(च) ‘Victoria Cross’ बान्थाखौ सोर मोनदोंमोन?
फिननाय:- सर्दार बाहादुर बेलबुराम सुबेदार।
(छ) गर्खा रेजिमेन्टखौ माब्ला दानाय जादोंमोन?
फिननाय:- 1919 मायथाइयाव।
(ज) साइमन कमिसननो होनाय गोसोखां बिलाइखौ सोर इंराजी रावजों लिरदोंमोन?
फिननाय:- गियासुद्दिन उकिलआ।
(झ) कालिचरणा ‘सारनित्य क्रिया’ बिजाबखौ माब्ला फरायनो खाबु मोनदोंमोन?
फिननाय:- 1905 इंराजी (बांला 1312 ) मायथाइयाव।
2. सुंद यै फिन हो-
(क) ‘सारनित्य क्रिया’ या मा ?
फिननाय:- ‘सारनित्य क्रिया’ या जादों स्वामी शिवनारायण परमहंस फोसावनाय आरो म’हिनी म’हन सट्टप’ध्याय सुजुनाय ब्रह्म धोरोमनि बेसेन गोनां राव एबा बिजाब। बे बिजाबाव बेद-बेदान्तनि गोथौ बाथ्राफोरखौ सुंद’यै बेखेवनाय दङ’।
(ख) कालिचरण ब्रह्मनि बिमा आरो बिफानि मुङा मा?
फिननाय:- कालिचरण ब्रह्मनि बिमानि मुंआ रोन्दिनी आरो बिफानि मुंआ खौलाराम मेसमोन।
(ग) कालिचरण ब्रह्मआ माब्ला आरो बबेयाव जोनोम मोनदोंमोन?
फिननाय:- कालिचरण ब्रह्मआ 1860 इंराजी (बांला 1267) मायथाइनि बैसाग दाननि 5 अक्ट’ खालि धुबुरी जिलानि सिङाव थानाय टिपकाइनि काजिगामियाव जोनोम मोनदोंमोन।
(घ) कालिचरण ब्रह्मआ बबेयाव आरो सोरनिफ्राय ब्रह्म धोरोमखौ आजावदोंमोन?
फिननाय:- कालिचरण ब्रह्मआ कलिकातायाव थांनानै स्वामी शिवनारायण परमहंसनिफ्राय ब्रह्म धोरोमखौ आजावदोंमोन।
(ङ) बेद शास्त्रआव इसोरखौ मा मा मुङै गाबज्रिनाय जायो ?
फिननाय:- बेद शास्त्र आव सासे इसोरखौनो साथामनि मुङै गाबज्रिनाय जायो—ब्रह्मा, विष्णु आरो महेश्वर।
(च) कालिचरणनि समाव बर’फोरा माबादि धोरोम फुजियोमोन?
फिननाय:- कालिचरणनि समाव बर’फोरा दोरोङारि बाथौ धोरोम फुजियोमोन। बै समाव बाथौ फुजा, खेराइ-माराइ, गारजा होनाय आरो मोदाइ फुजिनायनि मुङै दाउसा, फारौ, अमा, बोरमा हाथारनाय आरो जौ बाउनाय हुदाफोर सोलिदोंमोन।
(छ) कालिचरण ब्रह्मआ फोसाबनाय जायखिजाया मोननै गाज्रि हुदानि मुं लिर।
फिननाय:- कालिचरण ब्रह्मआ फोसाबनाय मोननै गाज्रि हुदाया जादों— बर’ समाजनि अगेन हुदा आरो हिन्जाव बोनाय हुदा।
(ज) फ’न थाखाया मा?
फिननाय:- बर’ समाजनि आगुनि हुदा बादियै फिसाजो (हिनजावसा) बिलायनाय एबा हाबा होनाय समाव हिनजावसा लायैनि सिगां न’नि मानसिया लानाय अनजिमा गैयि (बांद्राय) रांखौनो फ’न थाखा बुंनाय जायो।
(झ) धुबुरीनि Bodo Students’ Hostel- आ सोरनि नाजानायाव जादोंमोन लिर।
फिननाय:- धुबुरीनि Bodo Students’ Hostel-आ गुरुदेब कालिचरण ब्रह्मनि नाजानायाव जादोंमोन।
3. गाहायाव होनाय सोंथिफोरखौ बाजिसो सोदोबनि गेजेराव फिन हो-
(क) कालिचरण ब्रह्मनि जोनोम आरो लेखा फरायनायनि सोमोन्दै फोरमायना लिर।
फिननाय:- गुरुदेब कालिचरण ब्रह्मनि जोनोम थावनिया जादों धुबुरी जिलानि सिङाव थानाय टिपकाइनि काजिगामि। गुरुदेब कालिचरण ब्रह्मआ बांला 1267 मायथाइनि (1860 इ०) बैसाग दाननि 5 अक्ट’खालि अखा नायसि नायसि गोथार समाव जोनोम जादोंमोन। खाथियाव फरायसालि गैयिनि थाखाय बिफाया बीर नारायण मेसखौ न’आवनो लाखिनानै थाइथाम बेथनाव फोरोंहोदोंमोन। उनाव बिथाङा टिपकाइ प्राइमारी स्कुल आरो पुठिमारी एम. भि. स्कुलाव फरायदोंमोन, नाथाय थाखो बा सहैनायावनो बिफाया रंसारि जानायाव लेखा फरायनायखौ गारनांगौ जादोंमोन।
(ख) कालिचरण ब्रह्मखौ मानो गुरुदेब होन्ना बुङो?
फिननाय:- कालिचरण मावलांनाय हाबाया धोरोम फोसावनायावल’ जोबथायाखै। कालिचरणा माहारि सुस्रांनाय, फरायसालि गायसननाय, रांखान्थि आरो राजखान्थियाव सानथ्र’हायि भान्दारि होलांदोंमोन । बिथाङा बर’फोरनि गेजेराव मोनसे जांख्रिखांनाय (renaissance) लाबोदोंमोन। बिथाङा गोदान मुगा लाबोदोंमोन, आसाम हादरनि जनजातिफोरनि थाखाय। बेनिखायनो बिथांखौ गुरुदेब होननानै बयबो सिबियो। बिथाङानो धोरोमगुरु, समाज गुरु, फोरोंगुरु आरो रांखान्थि गुरु।
(ग) कालिचरण ब्रह्मआ माबोरै ब्रह्म धोरोमखौ आजावदोंमोन फोरमाय।
फिननाय:- 1905 मायथाइसोराव कालिचरण ब्रह्मआ सरन मण्डल बाबुनि खरसायाव स्वामी शिवनारायण परमहंस फोसावनाय “सारनित्य क्रिया” बिजाबखौ नुना फरायदोंमोन। बे बिजाबनि बेद-बेदान्तनि गोथौ सान्थौआ बाथौ धोरोमनि सृष्टि तत्वजों गोरोबनाय बादि मोननाय उनाव, बिथाङा 1906 मायथाइयाव कलिकातायाव थांनानै स्वामी शिवनारायण परमहंसनिफ्राय ब्रह्म धोरोम आजावदोंमोन।
(घ) कालिचरण ब्रह्मआ बर’फोरनि गेजेराव ब्रह्म धोरोमखौ माबादि फोसावदोंमोन लिर।
फिननाय:- ब्रह्म धोरोम आजावनाय उनाव 1906 मायथाइयाव कलिकातानि फनीन्द्र सेटार्जिखौ पुर’हित खालामनानै बैनागुरियाव गाजा-गोमजायै आहुति सावजेनदोंमोन। बेनि उनाव काजिगामि, गोमबीराखाता, बंसीजरा, क’कराझार आरो दाब दाब जायगायाव आहुति सावनानै गोजोननाय होयो । लासै लासै आसाम आरो सोनाब बंगनि बर’फोरनि गेजेराव फोसावदोंमोन।
(ङ) माहारि फोसाबनाय हाबायाव कालिचरण ब्रह्मआ मा मा हाबा मावलांदोंमोन फोरमायना लिर।
फिननाय:- माहारि फोसाबनाय हाबायाव बिथाङा आगुनि गाज्रि हुदा, जेरै—दाउ-अमा फिसिनाय, मैला-मैलि थानाय, जौ लोंनाय आरो हिन्जाव बोनाय हुदाखौ फोजोबदोंमोन। फिसाजो बिलायनायाव बांद्राय फ’न थाखा लाग्रा नेमखौ सोलायनानै रां 51.00 (बाजिसे) सिमल’ थि खालामदोंमोन आरो पूर्ण परम ब्रह्मनि नामै जग्याहुति होनानै हाबा होनाय गोदान गोथार नेम लाबोदोंमोन।
(च) साइमन कमिसननो गोसोखां बिलाइ हैनाय हान्जायाव सोर सोर दंमोन?
फिननाय:- 1929 मायथाइनि 4 जानुवारि खालि ‘सिलङाव’ साइमन कमिसननो गोसोखां बिलाइ होनाय सा द’ (6) सुबुंनि हान्जायाव दंमोन: (1) गुरुदेब कालिचरण ब्रह्म, (2) सर्दार बाहादुर बेलबुराम कसारि, (3) जादब खाखलारी, (4) करेन्द्र मण्डल, (5) बाबुराम ब्रह्म, आरो (6) गियासुद्दिन आहमेद।
(छ) गुरुदेब कालिचरण ब्रह्मआ बर’फोरनि गेजेराव मानो Clarion Call होदोंमोन?
फिननाय:- बै समाव बर’फोरनि गेजेराव गाज्रि हुदा, मैला-मैलि थानाय आरो आद्रियै गारनाय हुदाफोर दंमोन, जायनि थाखाय हारसाफोरा बर’फोरखौ मुगैयै होटल-दखानाव जायगा होआ बिखौ सुवा सानोमोन। हारिनि बे गिदिर मानहानि आरो दुखुखौ नुना हारिखौ सिखोन-साखोन, मोजां नेम-खान्थि आरो सोलोंथाइजों आवगायहोनो बिथाङा Clarion Call होदोंमोन।
(ज) गोदान भारत आयेनखौ माब्ला दादोंमोन? बे आयेना जनजातिफोरनो मा मा खाबु होदों?
फिननाय:- साइमन कमिसननि Report खौ लानानै 1935 मायथाइयाव गोदान भारत आइन दानाय जादोंमोन। बे आइन बादियै 1937 मायथाइनि विधान सभानि इलेकसन आव आसामनि जनजातिफोरनि थाखाय मासि सरैखा दोननायनि खाबु होदोंमोन। बे आयेनजोंनो रूपनाथ ब्रह्मआ MLA जाहैनो हादोंमोन।
4. फिन हो (100 निफ्राय 150 सोदोबनि गेजेराव)
(क) साइमन कमिसननो होनाय गोसोखां बिलाइयाव जनजाति एबा बर’फोरनि मा मा दाबिफोर दं फोरमाय।
फिननाय:- 1929 मायथाइयाव गुरुदेब कालिचरण ब्रह्मनि दैदेननायाव साइमन कमिसननो होनाय गोसोखां बिलाइयाव (Memorandum) बर’ आरो जनजातिफोरनि जौगानाय आरो रैखाथिनि थाखाय गाहायाव होनाय गोनां दाबिफोरखौ सोजोबनाय जादोंमोन:
(i) Census- आव बर’फोरनि थख’ column,
(ii) Assembly आरो Local Board- फोराव जनजातिनि थाखाय मासि सरैखा (Seat Reservation),
(iii) क’कराझार नडाब्ला हलतुगामियाव ग’वालपारा जिलानि मोनसे महकुमा दानाय।
(iv) बर’फोरनि गेजेराव गोबां प्राइमारी आरो एम.इ., एम.भि., फरायसालि गायसननाय।
(v) बै समाव ग’वालपारा जिलाखौ बेंगलजों दाजाबनायनि दाबि लाबोनाय मानसिखौ हेंथा होना ग’वालपाराया आसामनिसो आरो बेयो जेब्लाबो आसामजोंनो थागोन होनना सोजोबनाय जादोंमोन।
(vi) 1919 मायथाइयाव दानाय गर्खा रेजिमेन्टआव 3/4 बाहागोआनो बर’ सिपाइफोर एबा मेस सुबुंफोर थानाय खायसे बर’फोरनि थाखाय ‘बर’ रेजिमेन्ट’ खुलिनांगौ होनना गोख्रों दाबि खालामदोंमोन।
(ख) गोग्लैसोना थानाय बर’फोरनि गेजेराव कालिचरण ब्रह्मआ माबादि फोसाबनाय लाबोनो नाजादोंमोन?
फिननाय:- बै समाव गोग्लैसोना थानाय बर’ समाजनि अबस्थाया जोबोद मुगैथाव एबा लाजिनांथावमोन। बै समाव बाथौ फुजा, खेराइ-माराइ, गारजा होनाय, मोदाइ होनायनि मुङै दाउसा, फारौ, अमा, बोरमा हाथारनाय, जौ बाउनाय हुदा बर’फोरनि गेजेराव सोलिदोंमोन। हाबा-हुखायाव गोरिब-दोहोनि बयनिबो बेलायाव ओंखामनि आखाइ, बेदरनि आलि, जौनि फुख्रि, जाब्लाबो जाथ्र’ हाया, लोंब्लाबो लोंथ्र’हाया खालामनाय, आद्रियै गारनाय हुदाया कालिचरणनि गोसोआव दुखु होदोंमोन। गोन्दो-गोन्दो दाउ अमा फिसिनाय, जौ लोंनाय मैला-मैलि थायो होननानै हारसाफोरा बर’फोरखौ मुगैनायमोन। हटेलाव, साहा दखानाव बिसोरनो जायगा होआमोन। बिसोर जानाय-लोंनाय थुरसि, खुरै कापखौ सुवा जायो सानोमोन।
कालिचरणा माहारि सुस्रांनाय, फरायसालि गायसननाय, रांखान्थि आरो राजखान्थियाव सानथ्र’हायि भान्दारि होलांदोंमोन। बिथाङा बर’फोरनि गेजेराव मोनसे जांख्रिखांनाय लाबोदोंमोन। बिथाङा गोदान मुगा लाबोदोंमोन, आसाम हादरनि जनजातिफोरनि थाखाय। बेनिखायनो बिथांखौ गुरुदेब होननानै बयबो सिबियो। बिथाङानो धोरोमगुरु, समाज गुरु, फोरोंगुरु आरो रांखान्थि गुरु। गुरुदेब कालिचरणनि नाजानायाव बर’ समाजनि अगेन हुदा दाउ-अमा फिसिनाय, मैला-मैलि थानाय जानाय हुदाया जोबलांदोंमोन। फिसाजो बिलायोब्ला अनजिमा गैयि फन थाखा लाग्राखौ रां 51.00 (बाजिसे) सिमल’ लाग्रा नेम खालामनाय जायो। गुन्दा लुस्साफोरखौ दबथायो। हिन्जाव बोनाय हुदाखौ फोजोबलाङो। बिथांनि नेरसोन लानानै गोदान गोथार नेमजों पूर्ण परम ब्रह्मनि नामै जग्याहुति होनानै हाबा होनायखौ मानसिफोरा बाखनायो, गोसो जानानै गोबां मानसियानो बे धोरोमखौ नाजावो।
गुरुदेब कालिचरण ब्रह्मआ बर’फोरनो मोनसे Clarion Call होदोंमोन। बिथांनि लेंहरनायाव फालो फालो गावनो गोसोजों फैनानै बिथांनि खाथियाव साफिदोंमोन, खोनासंदोंमोन, थोननाय बादि हाबा मावदोंमोन। बिथांनि थोननायाव बर’ volunteer फोरा फालो फालो ओंखारनानै अमा बुथारदोंमोन, जौ दो बुखुबदोंमोन। मोदाइसालिफोरखौ गाख्रेबहैजोबदोंमोन। जायगा जायगा फरायसालि गायसननानै गथ’फोरखौ स्कुलाव थोनहरग्रा हुदा मानसिफोरनियाव जानो हमलाङो। सिखोन-साखोन थानाय आरो जानाय-लोंनायनि हुदा जालाङो। हाबायाव जौ बेदर होनाय नेमखौ गारहोयो। पूर्णिमा, अमाबस्या, बोसोर गोदाननि दिन, महालया आरो माघी पूर्णिमा दिनाव राइजोयै आहुति सावनानै संसारनि गाहामनि थाखाय इसोरनियाव बोर बिग्रा हुदा खालामलांदों गुरुदेबा। ब्रह्म धोरोमखौ लानानै सिखोन-साखोन थानाय, जानाय-लोंनायखौ नुनानै हारसाफोरा बर’फोरखौ मुगैनाया लासैनो खम जाबोनो हमो। लासै लासै लेखागोरों बांबोनायाव गुबुन हारिनि मानसिफोरा बर’फोरखौ मान होनाया जोंनि देरगानो गोनां हाबा।
बेबायदियैनो गोग्लैसोना थानाय बर’फोरनि गेजेराव कालिचरण ब्रह्मआ फोसाबनाय लाबोनो नाजादोंमोन।
(ग) कालिचरण ब्रह्मआ ब्रह्म धोरोम फोसावनायनि अनगायै समाजनि मा मा मोजां खामानि मावलांदों फोरमाय।
फिननाय:- कालिचरण मावलांनाय हाबाया धोरोम फोसावनायावल’ जोबथायाखै, बिथाङा ब्रह्म धोरोम फोसावनायनि अनगायैबो समाजनि गोबां मोजां आरो बिहोमागोनां खामानि मावलांदोंमोन। बिथाङा माहारि सुस्रांनाय, फरायसालि गायसननाय, रांखान्थि आरो राजखान्थियाव सानथ्र’हायि भान्दारि होलांदोंमोन। बिथाङानो धोरोमगुरु, समाज गुरु, फोरोंगुरु आरो रांखान्थि गुरु। गुरुदेब कालिचरणनि नाजानायाव बर’ समाजनि अगेन हुदा दाउ-अमा फिसिनाय, मैला-मैलि थानाय जानाय हुदाया जोबलांदोंमोन। फिसाजो बिलायोब्ला अनजिमा गैयि फन थाखा लाग्राखौ रां 51.00 (बाजिसे) सिमल’ लाग्रा नेम खालामनाय जायो। गुन्दा लुस्साफोरखौ दबथायो। हिन्जाव बोनाय हुदाखौ फोजोबलाडो। बिथांनि नेरसोन लानानै गोदान गोथार नेमजों पूर्ण परम ब्रह्मनि नामै जग्याहुति होनानै हाबा होनायखौ मानसिफोरा बाखनायो, गोसो जानानै गोबां मानसियानो बे धोरोमखौ नाजावो।
सोलोंथाइनि बिथिङाव बिथांनि नाजानाय आरो चीफ-कमिशनर श्री अर्शडेल अर्ल साहाबनो आर’ज बिलाइ होनायनि हेफाजाबजों टिपकाइयाव उइभिं (उनावनाय) आरो कार्पेन्ट्रि (सन्द्राय) थादेरनाय गंसे एम.भि. स्कुल आरो गुबुन दाब दाब जायगायाव गंथाम प्राइमारी स्कुल मन्जुर खालामना लानो हादोंमोन। बर’ फरायसा सुबुंफोरनि अनसाय थाखाय धुबुरीयाव ‘Bodo Students’ Hostel’ गायसननायाव बिथाङा गिदिर बिहोमा होदोंमोन आरो फरायसाफोरखौ खौसे खालामनो थुलुंगा हरदोंमोन।
(घ) सर्दार बाहादुर बेलबुंराम कछारीनि सोमोन्दै फरानि हेफाजाब लाना फोरमायना लिर।
फिननाय:- सर्दार बाहादुर बेलबुंराम कछारी (सुबेदार) आ सासे साहसि आरो हारिनि मोजां मोनग्रा सुबुंमोन। बिथाङा सेथि मुलुग दावहायाव बाहागो लानानै ‘Victoria Cross’ बान्था मोननो हानाय सासे मानगोनां सुबेदारमोन। बिथाना सासे ‘Victoria Cross’ सुबेदार जानाय खाय ब्रिटिस सरकारनिफ्राय ‘एकखुन माफ’ (सासे मानसिखौ गावथारब्लाबो दाय गैयि) अर्डार पत्र मोनदोंमोन।
1929 मायथाइनि 4 जानुवारि खालि साइमन कमिसननो गोसोखां बिलाइ होनो थांनाय समाव सिकिउरिटि गार्दआ बिसोरनि हान्जाखौ कमिसननि खाथियाव थांहोथाराखैमोन। बै समाव सर्दार बाहादुर बेलबुंराम सुबेदारा रागा जोंनानै गावनि सुबेदार खसाब गानना, बिखायाव Victoria Cross मेदेल आलायना, आखाइयाव पिष्टल आरो आगसि आखाइयाव ‘एकखुन माफ’ अर्डार पत्र लाना गार्दखौ बुंदोंमोन—”बले नों थैनो ना गेटखौ खेवनानै होनो।” बिथाङा पिष्टलखौ गार्दनि खाफाल थोंजों होनाय उनावसो गार्दआ गिलायना गेटखौ खेवना होयो आरो बिथांनि थाखायनो बर’ हान्जाया साइमन साहाबजों नुजाना गोसोखां बिलाइ होनो हादोंमोन।
(ङ) कालिचरण ब्रह्म आ बर’ फरायसाफोरनि गेजेराव माबादि थुलुंगाखांनाय हाबा मावलांदों फोरमायना लिर।
फिननाय:- गुरुदेब कालिचरण ब्रह्मआ बर’ फरायसा सुबुंफोरखौ हारिनि खुन्टिया सानोमोन। बेखायनो बिथाङा बर’ फरायसाफोरनि गेजेराव सोलोंथाइ गोसारहोनो, खौसेथि लाबोनो आरो बिसोरखौ थुलुंगा होनो गिदिर हाबा मावलांदोंमोन। बै समाव रूपनाथ ब्रह्ममोना फरायसालि आव फरायबाय थानाय समाव गुरुदेबनि थुलुंगा आरो दैदेननायावनो सिगां खेब बर’ फरायसाफोरनि ‘बर’ फरायसा जथुम्मा’ (Students’ Conference) खुंनाय जादोंमोन। बेनि उनाव गुरुदेबनि थोननाय आरो बानबुंथि बादियै ‘लेखा दुलाराय आसाम बर’ फरायसा आफाद’ (All Assam Bodo Students’ Association) खौ गायसननाय जादोंमोन, जायनि सिगां नेहाथारिया जादोंमोन मानाक’सानि सुर्यनारायण ब्रह्म। बर’ सन्मिलन (Bodo Sammelan) गायसननायनि गुदि मावथियाबो गुरुदेब कालिचरण ब्रह्मआनो मोन। बिथाङा फरायसाफोरखौ खौसे खालामना समाज सुस्रांनाय आरो राजखान्थियाव हारिनि सरैखा लानो हानायबादि गोहो गोसो थुलुंगाखांहोदोंमोन।
SEBA Class 10 Bodo Medium MIL Question Answer
खन्थाइ आयदा : | |
फारि नं | फरा |
1 | |
2 | |
3 | |
4 | |
5 | |
6 | |
7 | |
8 | |
रायथाइ / सल' आयदा : | |
9 | |
10 | फालांगियारि सुबुं जानि फै |
11 | इन्टारनेटनि गोदै गोखा |
12 | बर' हारिनि खुगाथुनलाइ |
13 | हारिमानि खौसेथि |
14 | हाग्रामा दावबायनाय |
15 | बर' मोसानाय |
16 | अरुनिमा सिन्हा-गाव फोथायथि आरो साहसनि गुबुन मोनसे मुं |
17 | मन्थ्रि फैगोन |
Note: If you find any mistakes in these questions and answers, you can tell us or correct it yourself.
जुदि नोंथाङा बेफोर सोंथिफोर आरो फिननायाव माबा गोरोन्थि मोनो, अब्ला नोंथाङा जोंनो खोन्थानो हागोन एबा गावनो बेखौ सुद्रायनो हागोन।
Class 10 Other Subjects:गुबुन आयदाफोर
1. English
2. Science
3. Social Science
4. Mathematics
5. Hindi
FAQ
Where I can get ASSEB/SEBA Class 10 Bodo Medium MIL Chapter-9 Question Answer "समाज फोसाबगिरि गुरुदेब कालिचरण ब्रह्म" ?
You can get the complete ASSEB/SEBA Class 10 Bodo Medium MIL Chapter-9 Question Answer “समाज फोसाबगिरि गुरुदेब कालिचरण ब्रह्म” on Bodoland Library.
Are these Class 10 MIL-Bodo Chapter-1 question answers useful for Exam?
Yes, these Chapter-9 Question Answer “समाज फोसाबगिरि गुरुदेब कालिचरण ब्रह्म“ are useful for exam.
Are these question answers based on the latest ASSEB/SEBA Class 10 syllabus?
Yes, the questions and answers are prepared according to the latest ASSEB/SEBA Class 10 syllabus.
Are these SEBA Class 10 MIL Question Answers helpful for HSLC exams?
Absolutely. These notes are exam-oriented and help students write correct and well-structured answers in the SEBA HSLC examination.