Class 9 Bodo Medium MIL Chapter-11

4. गाहायनि सोंनायनि फिननायखौ 150 सो सोदोबजों फिन :

(क) आखल गोनां मानसिफोरा समाजाव माबादि जायगा मोनो लिर।

फिननाय: आखल दानाय रायथाइनि बादिब्ला, आखल गोनां मानसिफोरा समाजाव जोबोर गोजौ, मानगोनां आरो अनजाथाव जायगा मोनो। आखल गोनां मानसिया गरिब एबा निखाउरिथार जाब्लाबो बियो समाजाव बयनिख्रुइबो मोजां मान-सनमान मोनो, मानोना आखलानो मानसिनि बयनिख्रुइ रुजुजाथावि दोहोन आरो बिमुं। दुगामारा एबा दुथां गोसोनि दोहोनि मानसिफोरा गोबां रां-रुफा बाहायनानैबो जाय खामानिखौ मावनो हाया, आखल गोनां मानसिफोरा बेखौ इसाराजोंनो मावफुंनो हायो।

         आखल गोनां सुबुङा समाजाव जाय थासारियावनो थाया मानो, बियो मुलुगनि बयनिबो अनजाथाव दोहोन जायो, मानोना मानिकनि अनसायजानाया जेरावबो दं। बिथांमोना ग’साइया होनाय मोजां गुनफोरनि बिगोमा जानानै थैनानैबो थैरोङि महरै मुंदांखा जाना थानो हायो। आखल गोनां सुबुङा समाजाव थाब्ला समाजा गोजोन गोगो दै बोहैनाय निजोरा बादि आरो सोमखोर समायना आबादथिलि बादि अराय गोथार गोजोन गोगो जायो। बिसोर गुबुननि मोजां मावनानै गोसोआव गोजोननाय मोनो आरो समाजाव सान ओंखारनाय बादि गियाननि सोराङै बुंफब होयो।

(ख) आखल मोजां खालामनायाव सर’नि गोनांथिया मा?

फिननाय: आखल मोजां खालामनायाव सर’नि गोनांथिया जोबोर बिदिर आरो नांगौथार, मानोना उन्दै समनि सर’आनो लासै-लासै मानसिनि हुदायाव बारस्लायो। जेरैबादि रुइदुब बेगरफोरा दै सारस्रो सारस्रो खालामनायनि थाखाय थाबैनो गाजा बेरखाङो, बिदिनो उन्दै बैसोनिफ्राय गोगो सोलोंथाइनि एफा एफा सर’ खालामनायजों गोसोआव आखल बेगरा मोजाङै रज’यो।

         जुदि उन्दै बैसोआव मोजां आखलनि सर’ खालामा, अब्ला सेंग्रा बैसोनि इनाय अनागारिया आखल बेगरखौ खनजों-जाबजों गाज्रि खालामो। लिरगिरिया बुंदों दि हानि दो-दोख्ला दाग्राफोरा हानि दो-दोख्लाफोरखौ गुरै गोथां हा दानाय समाव जेरैबादि गोसो एरै महर होनो हायो, नाथाय अराव सावनायनि उनाव महरखौ सोलायनो हाया, बिदिनो उन्दै बैसोआनो मोजां सर’ खालामना आखल दानायनि थार सम। उन्दै बैसोआव मोजां आखलनि सर’ खालामनाया गोसो लैथोआव आखल फामे बिबार बारग्लांनाय बादि जायो। मोजां हुदा आरो आखलनि गोथार सर’आ मानसिखौ इयुनाव सासे मोजां आरो गुनगोनां सुबुं महरै दानायाव गाहाइ हेफाजाब होयो।

(ग) गाज्रि साननायखौ होखारनायनि राहाफोरा मा मा?

फिननाय: गाज्रि साननाया मानसिनि गोसोखौ गुन अरनाय औवा बादि सिं सिं खंख्ला खालामलाङो आरो मेलेमाव थुबुर जानानै गाज्रि खामानि मावनायाव हेफाजाब होयो। बेखायनो गाज्रि साननायखौ होखारनाया जोबोर गोनां, आरो बेनि माखासे राहाफोर होनाय जादों:

(i) गाज्रि साननायखौ मासे बिसो गोनां जिबौनि मुसुखा बादि साननानै अराय गोसो सिङाव लाखिनांगौ, मानोना जिबौखौ जों अरायबो गियो आरो बेनिफ्राय गोजानाव थानो नाजायो।

(ii) गाज्रि साननाया गोसोआव फैनाय लोगो लोगोनो मोजां बिजाब फरायनांगौ, मोजां खोथा सावरायनांगौ एबा मोजां सानहाबनांगौ।

(iii) जायफोरा रोजाबनाय-दामनायाव आखा-फाखा, बिथांमोना गाज्रि साननाय फैब्ला ईसोर सिबिनाय मेथाय रोजाबनांगौ, जाय गोसोखौ सुदेम बार बादि गोजोनहोयो।

(iv) हाबथासेआव खमैब्लाबो सानथाम गेदेमा सुबुंफोरनि जिउ खौरां फरायनांगौ आरो गोसोआव मोजां साननाय अराय सांग्रां खालामना लाखिनांगौ।

(v) आबादथिलिनि नांथारि हाग्रा-बंग्राफोरखौ जेरै गोरलैयावनो बुफुना फोजोबनाय जायो, बिदिनो गाज्रि साननायनि गुदिखौ रोदाजों बुफुना गारनांगौ।

(घ) गिदिर मानसिनि जिउखौरां फरायनाया गाज्रि लोगो गारनायाव माबादि हेफाजाब होयो?

फिननाय: आखल दानाय रायथाइनि बादिब्ला, गाज्रि लोगोआ आखल दानायाव बयनिख्रुइबो गाहाइ हेंथा। गाज्रि लोगोजों खेबसे गोरोबलायोब्ला मानसिआ ब्लटिं लेखायाव खालि सोबखांनाय बादि बेयावनो गोदोसोनानै थायो। बेबायदि थासारिनि राहा महरै गिदिर मानसिफोरनि जिउ खौरां फरायनाया जोबोर मोजां हेफाजाब होयो।

     जेब्ला जों हाबथासेआव खमैब्लाबो सानथाम गिदिर मानसिफोरनि जिउ खौरांफोरखौ गोसो होनानै फरायो, अब्ला जों बिथांमोना जिउआव माबादि मोजां आखल, सैथो बाथ्रा आरो गोगो गोथार साननायजों देरहासार जादों बेफोरखौ मिथिनो मोनो। गिदिर मानसिफोरनि मोजां बिदिन्थि आरो मोजां खामानिफोरा जोंनि गोसोआव मोजां सान्थाइ आरो हाबा मावनायनि सानखांथिखौ बेरखां होयो। बे मोजां साननाया गोसोआव सांग्रां जाबाय थाब्ला गाज्रि साननाय एबा गाज्रि हुदाफोरनि मुसुखाया लासै-लासै गोसोनिफ्राय जानगार जायो। जेब्लासिम जों मोजां मानसिनि मुसुखा सावगारि, मोजां आखल आरो मोजां बिजाब फरायबाय थागोन, अब्लासिम जों मोजां लोगोजों थाफादों होनना मिथिनो नांगोन, जाय जोंखौ गाज्रि लोगोफोरनि लोरबां हुदानि फ्राय गोजानाव लाखिनो थाखाय गोसोनि बोलो होयो। 

5. गुदि खोथाजों सोमोन्दो लाखिनानै बेखेवना लिर :

(i) जायहा खन गैया, बेखौ दै लुबाय थाब्लाबो रज’ रोङा।

फिननाय: बे बाथ्रा सिरिखौ न’मल चन्द्र बर’ बिथाङा लिरनाय ‘आखल दानाय’ रायथाइनिफ्राय लानाय जादों। बे बाथ्रानि गेजेरजों लिरगिरिया मानसिनि गोसो सिङाव थानाय मोजां आखलनि गुदि गोनांथिखौ फोरमायदों।

        मिथिंगायाव जेरैबादि खन गैयि बेगर गरसेखौ नों जेसेबां दै एबा हासार होबाय थाब्लाबो, बेयो माब्लाबाबो गाजा बेरखाङा आरो रज’नो हाया। बेगरनि सिङाव आगुनिफ्रायनो रज’नायनि खन थानाया जोबोर गोनां। बिदिनो, मानसिनि जिउआवबो सोलोंथाइ, गियान एबा मोजां बोसोनफोरा दै बादि खामानि मावो। नाथाय दि मानसिनि गोसो-गोरबोआव आखल दानायनि गुदि मोजां साननाय एबा खन गैया, अब्ला बे मोजां सोलोंथाइनि दैखौ सारबाय थाब्लाबो बेनि जेबो लाब जाया। मानसिखौ सासे मोजां सुबुं महरै दानायनि थाखाय बिनि गोसोनि सिङाव आगुनिफ्रायनो मोजां आखुनि गुदि थानाया नांगौथार। 

(ii) आखल गोनां मानसिया जि थासारियावनो थायामानो बियो मुलुगनिनो अनजाथाव दोहोन।

फिननाय: बे बाथ्रा सिरिखौ न’मल चन्द्र बर’ बिथाङा लिरनाय ‘आखल दानाय’ रायथाइनिफ्राय लानाय जादों। बे बाथ्रानि गेजेरजों लिरगिरिया आखल गोनां मानसिनि मान-सनमान आरो अनसायजानयखौ बुंथिदों।

सुबुं समाजाव आखल आनो मानसिनि बयनिख्रुइ गोजौसिन आरो रुजुजाथावि दोहोन। सासे आखल गोनां मानसिया गरिब, दुखुथिया एबा जेबादि लोरबां थासारियावनो थाया मानो, बिनि मोजां गुन आरो गोगो आखलनि थाखाय बियो मुलुगनि बयनिबो अनजाथाव आरो मानगोनां सुबुं जायो। जेरैबादि मानिकखौ जेरावखि दोना मानो, बियो बयनिबो अनसायजानाय एबा मोजां मोनजानाय मोनो, बिदिनो आखल गोनां मानसिखौबो बयबो मान लायो आरो बिथाङा बयनिबो मोजां मोनजानाय जायो। दुगामारा एबा दुथां गोसोनि दोहोनि मानसिफोरा गोबां रां बाहायनानैबो जाय खामानिखौ मावनो हाया, आखल गोनां मानसिफोरा बेखौ इसाराजोंनो मावफुंनो हायो। बेखायनो आखल गोनां मानसिखौ बयनिबो अनजाथाव दोहोन होनना बुंनाय जादों।