SEBA Class 8 Social Science Chapter-7

4. रेबसुं लिर-

(क) दैमानि गोजौ बोहैथि बाहागोनि हाबा

फिन:- दैमानि गोजौ बोहैनाया फ्राय आबुङै हाजोआरि गोजौ ओनसोलावल’ जायो। दैमानि बोहैनाया हाजोनि फुंखानिफ्राय जागायजेनो आरो हायेनाव सहैजासिम सोलिबाय थायो।  बे बाहागोआव दैमाया थिया सरख्लायजों बोहैबोनांगौ जानायखाय दैमानि थालायाव खुरखानाया बांसिन जायो। बेनिखायनो बे बाहागोआव दैमानि बोहैथि लामानि महरा इंराजी U हांखोनि बादि जायो। हाजोआरि ओनसोलनि थिया सरख्लायजों बोहैबोनाय दाहारा बोहैथि लामायाव थानाय अन्थाइ, बाला, हा आरिफोरखौ खुरनानै गाहायसिम रोगाना लाबोयो।

(ख) दैमानि गेजेर बोहैथि बाहागोनि हाबा

फिन:- दैमाया बे बाहागोआव एसेल’ सरख्लायनि हा बाहागोजों बोहैलांनायखायनो दैमानि बोहैनाय गोख्रैथिया रुजुथावना बादियै लासै। बेनिखायनो बे बाहागोआव दैमानि गोदि ज’नाय रोगाथाइ गोहोआ खम। फिथाइ महरै हिमालय ओनसोलनिफ्राय बुखारना लाबोनाय अन्थाइ, बाला, हाब्रु आरिया हायेन ओनसोलाव ज’ जायो।

(ग) दैमानि गाहाय बोहैथि बाहागोनि हाबा

फिन:- दैमानि बे बाहागोयाव दैमानि गोख्रैथिया जोबोर लासै लासै जानायनि थाखाय गोदि ज’नायनि बिबाङा बारा। बेनिखायनो बेनि बोहैथि लामायाव गोबां अनजिमानि दुबसां नुनो मोनो। दैमानि मोखां बाहागोआव दैमाया बुखारनानै लाबोनाय गोदिफोरा ज’ जानानै असमीया ‘ब’ हांखो एबा आखान्थि थाम  महरनि ब-द्वीप सोमजिदों।

(घ) बराक दैमानि बोहैथि लामा

फिन:- नागालेण्ड, मणिपुरनि सिमाजिङाव थानाय मराम मुंनि ओनसोलनिफ्राय बराक दैमाया ओंखारदों। फुंखानिफ्राय मणिपुरनि गेजेरजों खोला-सोनाबथिं बोहैबोनाय दैमाया मणिपुर-मिजराम सिमायाव फिन साहाफारसे मोखां जानानै बोहैदों। आसाम आरो मणिपुरनि सिमाजों साहाथिं फैनानै जिरि मुंनि दैसाया लोगो नांनायनि उनावनो बेयो सोनाबथिं गिदिंना फैनानै आसामाव हाबफैदों। दैमाया आसामनि काछार जिलानि गेजेरजों बोहैबोना हाइलाकान्दि आरो करिमगन्ज जिलानि सा बाहागोथिं बोहैलांदों। भारत बांलाहादरनि सिमायाव दैमाया खावनै बाहागो जादों। बेनिनो बाहागोसेया कुछियारा आरो गुबुन बाहागोआ सुरमा मुं लाना बांला हादराव हाबदों। एसे गोजान बोहैलांनायनि उनाव फिन दोंनैबो दालाइ दैमाया लोगो नांना मेघना मुं लानानै पद्माजों गोरोबफानानै बंग’प लैथोआव गोग्लैयो। बराक दैमाया 900 किल’मिटारफ्राम गोलाउ। बेयो 30 मिटारनिफ्राय 300 मिटारसिम गुवार। बराक दैमानि आसाम ओनसोलाव दों 27 फ्राम गेदेर-फिसा दैसा दं। दैमाया आसाम आरो बांलाहादर बाहागोआव बेनि बोहैथिया जोबोर लेहेम। काछार बाहागोआव दैमानि फारनैथिंबो सान्थ्रहायि नुनो मोनो। दिमोल बांलादेशाव बे दैमाया सेलानि महर लादों। 

5. बुरलुंबुथुर दैमानि बोहैथि लामाया बांसिनानो खेंख्रा-खेंख्रि मानो ?

फिन:- नोरोम (गुरै) सरख्लायाव लासै लासै बोहैथिजों बोहैनाय दाहारनि दैमा थालानि खुरखानाय गोहोआबो एसेल’। बेनिखायनो आसामाव बुरलुंबुथुर  दैमानि थाला खुरखानायनि बिबाङाबो खम। नाथाय बेनि उल्थायै आसामनि बाहागोआव दैमानि रुगुं खुरखानाय थामहिनबा हाब्रां खुरखानाया बांसिन जायो। दैमानि फारनैथिंनि हानि दाथाया गुरै जानायनि थाखाय दैमाया फारनैथिंबो गोख्रै खुरखानाय सोमजिहोयो। दैमानि जाय रुगुङाव हाब्रां खुरखानाया जायो बेनि उल्थाथिं गुबुन रुगुङाव गोदि बोहैखारनाया जायो। बे हाब्रां खुरखानाय आरो बोहैखारनायनि जाउनाव बुरलुंबुथुर दैमानि बोहैथि लामाया खेंख्रा-खेंख्रि एबा दिंग्राय दिंसि जानाय नुनो मोनो।

6. फुंखानिफ्राय दैमा मोखांसिम बुरलुंबुथुर दैमानि बबे बबे बाहागोखौ आथिखालाव मा मा मुङै मिथिनो मोनो लिर।

फिन:- तिब्बत (चीन)-चांप

अरुणाचल प्रदेशाव- चियां

आसाम- बुरलुंबुथुर

बांला हादर- पद्मा